ထိုင်းနိုင်ငံတွင် အာဏာရပါတီအနေနှင့် လိမ်လည်မှု စွဲဆိုချက်များဖြင့် ရင်ဆိုင်နေရ၍ အကျပ်အတည်းများ ဖြစ်ပေါ်လျက်ရှိခြင်း

ထိုင်းနိုင်ငံ၏ ရွေးကောက်ပွဲကော်မရှင်က အင်္ဂါနေ့(၂-၉-၂၀၀၈)တွင် ၀န်ကြီးချုပ် Mr.Samak Sundaravej ၏ ပါတီသည် ဒီဇင်ဘာလရွေးကောက်ပွဲများတွင် ရွေးကောက်ပွဲဆိုင်ရာ လိမ်လည်မှု ကျူးလွန်ခဲ့ခြင်းကြောင့် ၎င်း၏ ပါတီကို ဖျက်သိမ်းရန် ဆုံးဖြတ်ခဲ့ကြောင်း အစိုးရသတင်းဌာနများက သတင်းပေးကြပါသည်။

အဆိုပါ ဆုံးဖြတ်ချက်သည် People’s Alliance for Democracy (PAD) ဦးဆောင်သည့် အစိုးရ ဆန့်ကျင်ရေး ဆန္ဒပြသူများနှင့် လက်ရှိဝန်ကြီးချုပ်ကို ထောက်ခံသူများအကြား ဘန်ကောက်မြို့တော်တွင် အဓိကရုန်းများ ဖြစ်ပွားပြီးနောက် ၀န်ကြီးချုပ် Mr.Samak က အရေးပေါ်အခြေအနေကို ကြေညာသည့်နေ့တွင် ပေါက်ပေါက်ခဲ့ခြင်းဖြစ်ပါသည်။

ဆန္ဒပြသူများအနေဖြင့် ပြီးခဲ့သောအပတ်က နိုင်ငံတလျှောက် လေဆိပ်(၃)ခုကိုပိတ်ခဲ့ပြီး ဘန်ကောက်အပြည်ပြည်ဆိုင်ရာ လေဆိပ်ကိုလည်း အလားတူ ပြုလုပ်လိမ့်မည်ဟု မျှော်လင့်ရပါသည်။ ထိုသို့ ပိတ်ပစ်လိုက်ပါက အကြီးအကျယ် ဗရမ်းဗတာဖြစ်သွားစေမည် ဖြစ်ပါသည်။ အကြောင်းမှာ အပြည်ပြည်ဆိုင်ရာ ခရီးသွားအများစုသည် ဘန်ကောက်အပြည်ပြည်ဆိုင်ရာ လေဆိပ်ကို လေကြောင်းခရီးစဉ် ချိတ်ဆက်မှုများ အတွက် အသုံးပြုနေကြသည့်အတွက်ကြောင့် ဖြစ်ပါသည်။

PAD ခေါင်းဆောင် Mr.Sondhi Limthongku က မိမိတို့လေဆိပ်ကို ခေတ္တပိတ်ပစ်ရန်သာဖြစ်ပြီး မိမိတို့၏ လှုပ်ရှားမှုကို သိသာထင်ရှားစေလိုသော လက္ခဏာတစ်ရပ်အဖြစ် ပြသလို၍ဖြစ်ကြောင်း ပြောကြား ပါသည်။

ဆန္ဒပြသူများအနေဖြင့် အထွေထွေသပိတ်ကြီးကို ဗုဒ္ဓဟူးနေ့ (၃-၉-၂၀၀၈)ပြုလုပ်ရန် ကြွေးကြော် လျက်ရှိပြီး သမဂ္ဂ(၄၀)နှင့်အထက် ပါ၀င်ရန်သဘောတူထားပြီးဖြစ်ကြောင်းနှင့် နိုင်ငံကို ယာယီအားဖြင့် ပုံမှန်လုပ်ငန်းများ လုပ်ကိုင်ခြင်းမပြုနိုင်ရန် ရည်ရွယ်ပါသည်။ လက်ရှိအစိုးရအုပ်ချုပ်ရေးဌာနချုပ်ဖြစ်သော အစိုးရအဆောက်အအုံကို ဆန္ဒပြသူများက ဆက်လက်ဝိုင်းထားလျက်ရှိပါသည်။

ရွေးကောက်ပွဲကော်မရှင်၏ People’s Power Party (PPP)ကို ဖျက်သိမ်းရန် တညီတညွတ်တည်း ဆုံးဖြတ်ချက်သည် ချက်ခြင်းထိရောက်မှုမရှိဟု မျှော်လင့်ရပါသည်။ ကော်မရှင်အနေဖြင့် အဆိုပါကိစ္စရပ်ကို ပြည်သူ့တရားစွဲဆိုရေးရုံးတော်သို့ တင်ပြမည်ဖြစ်ပြီး၊ ရုံးတော်မှ ဖွဲ့စည်းပုံအခြေခံဥပဒေပြု တရားရုံးသို့ နောက်ဆုံးအဆင့် ဆုံးဖြတ်ချက်အတွက် တင်သင့်/မသင့် ဆုံးဖြတ်ရန် ၎င်းတို့ကိုယ်တိုင် စုံစမ်းစစ်ဆေးရဦး မည် ဖြစ်ပါသည်။

အင်္ဂါနေ့ (၂-၉-၂၀၀၈) ရွေးကောက်ပွဲကော်မရှင်၏ ဆုံးဖြတ်ချက်သည် လက်ရှိဝန်ကြီးချုပ် Mr.Samak အတွက် နောက်ထပ်ထိုးနှက်ချက်တစ်ခုဖြစ်ပြီး၊ ၎င်းအနေဖြင့် နေ့စဉ်နှင့်အမျှ အစိုးရဆန့်ကျင်ရေး ဆန္ဒပြပွဲ များနှင့် ရင်ဆိုင်နေရသူလည်း ဖြစ်ပါသည်။ တနည်းအားဖြင့် လမ်းပေါ်မှ ဆန္ဒပြမှုများနှင့် တရားရုံး ဆုံးဖြတ်ချက်များတို့၏ စိန်ခေါ်မှုများနှင့် ရင်ဆိုင်နေရသူဖြစ်ပါသည်။ ၎င်းသည် အင်္ဂါနေ့တွင် နိုင်ငံ၏ ဖွဲ့စည်းပုံ အခြေခံ ဥပဒေကို လွှမ်းမိုး၍ အရေးပေါ်အခြေအနေကို ကြေညာခဲ့ပြီး တပ်မတော်အား တရားဥပဒေစိုးမိုးရေးအတွက် တာဝန်ယူရန် ခွင့်ပြုခဲ့ပါသည်။ အရေးပေါ်အခြေအနေဥပဒေသည် လူငါးယောက်အထက် စုစည်းခြင်းနှင့် လူများအထိတ်တလန့်ဖြစ်စေသော ရုပ်ပုံများထုတ်လွှင့်ခြင်းနှင့် ရုပ်ပုံများ ဖြန့်ဝေခြင်း စသည့်မီဒီယာအလုပ် များကို တားမြစ်ထားပါသည်။ သို့ရာတွင် နေဝင်မီးငြိမ်း (Curfew)ထုတ်ပြန်ခြင်း မပြုသေးပါ။

၄၃ ပြည်နယ်ရှိ လုပ်ငန်းများမှ လုပ်သား (၂)သိန်းကျော်ကို ကိုယ်စားပြုသော အလုပ်သမား သမဂ္ဂများသည် စီမံချက်ဖြင့် ဗုဒ္ဓဟူးနေ့ (၃-၉-၂၀၀၈)မှ စ၍ အစိုးရ ရုံးများကို ရေ၊လျှပ်စစ်နှင့် ဖုန်းလိုင်းများကို ဖြတ်တောက်သွားရန် အစီအစဉ်ရှိပါသည်။ ထိုင်းလေကြောင်း ၀န်ထမ်းများအနေဖြင့် ဗုဒ္ဓဟူးနေ့မှစတင်၍ လေကြောင်းလိုင်းအချို့ကို နှောင့်နှေးအောင်ပြုလုပ်မည်ဖြစ်ကြောင်း ပြောကြားကြပါသည်။ ကုန်လမ်း ပို့ဆောင်ရေးလုပ်သားများ အနေဖြင့် ဘန်ကောက်မြို့၏ ဘတ်စ်ကားလိုင်းများ၏ ၈၀%ကို ရပ်တန့်ပစ်မည်ဟု ပြောပါသည်။ ရထားလုပ်သားများအနေဖြင့် ရထားကွန်ရက်လမ်းကြောင်းများကို အကြီးအကျယ်ထိခိုက်အောင် ဆောင်ရွက်ပြီး ဖြစ်နေပါသည်။

တပ်မတော် ဗိုလ်ချုပ် Anupong Paochinda က တပ်မတော်အနေဖြင့် အင်အားသုံးမည်မဟုတ် ပါကြောင်း၊ ထောက်ခံမှုလည်း ပြုလုပ်မည်မဟုတ်သကဲ့သို့ ယခင်(၂)နှစ်ခန့်က ၀န်ကြီင်္းချုပ်ဟောင်း Mr.Thaksin Shinawatra ကို ရာထူးမှထွက်သွားအောင်ပြုလုပ်ခဲ့သော အာဏာသိမ်းမှုမျိုးကိုလည်း ပြုလုပ်မည်မဟုတ်ကြောင်း ပြောကြားပါသည်။ ထိုင်းရဲနှင့် တပ်များမှ ပုဂ္ဂိုလ်တိုင်းသည် ပြည်သူလူထုအား မည်သည့်နည်းနှင့်မျှ အင်အားအသုံးပြု၍ နှိမ်နှင်းမည် မဟုတ်ကြောင်း၊ အကယ်၍ အင်အားအသုံးပြု၍ အာဏာသိမ်းမည်ဆိုပါက ပြဿနာကို ပိုမိုကြီးထွားအောင် လုပ်ရုံသာရောက်ပါကြောင်း ၊ သတင်းစာ ရှင်းလင်းပွဲတွင် ပြောကြားသွားပါသည်။

ယခုလက်ရှိအခြေအနေမှာ အမှားအယွင်း အတိမ်းအစောင်းမခံသော အခြေအနေဖြစ်ကြောင်း၊ ဘာပဲ မိမိတို့လုပ်လုပ်၊ ဘက်လိုက်ထောက်ခံမှု မရှိအောင် သတိထားဆောင်ရွက်သွားမည် ဖြစ်ပါကြောင်း၊ ယခုအခြေအနေမှာ လူထုအဖွဲ့အစည်းကြီးအတွင်း သဘောမတူညီသော အုပ်စု(၂)စုကွဲနေခြင်းဖြစ်ပါကြောင်း ထပ်လောင်းပြောကြားသွားပါသည်။

လက်ရှိဝန်ကြီးချုပ် Mr.Samak က အရေးပေါ်အခြေအနေ ကြေညာပြီးနောက် ၄င်ကိုယ်တိုင် ပြုလုပ်သည့် သတင်းစာရှင်းလင်းပွဲတွင် မိမိကိုလူဆိုးအဖြစ် ဘာကြောင့် ပြည်သူများက ထင်နေသည်ကို မိမိနားမလည်ပါကြောင်း၊ မည်သူက ဘာကြောင့် အခြားတစ်ဖက်၏အကြောင်းကို မပြောကြားသည်ကို မိမိ သိလိုပါကြောင်း ပြောကြားခဲ့ပါသည်။

အခြားတစ်ဘက်ဖြစ်သည့် မိမိကိုယ်မိမိ People’s Alliance for Democracy (PAD)ဟု ခေါ်ဆိုသော ပါတီမှာ အလယ်အလတ် လူတန်းစား၊ မြို့ပြနှင့်တောရွာ လူတန်းစားအချို့တို့ ရောနှောနေသည့် ပါတီ ဖြစ်ပါသည်။ ၎င်းတို့၏အမြင်မှာ ဒီမိုကရေစီသည် အလုပ်မဖြစ်ကြောင်း၊ တစ်ခုတည်းသော ရည်မှန်းချက်မှာ လက်ရှိအစိုးရအနေဖြင့် အုပ်စိုးသူနေရာမှ ဆင်းပေးရေးပင်ဖြစ်ပါကြောင်း ပြောကြားကြပါသည်။

People’s Alliance for Democracy (PAD)အဖွဲ့ဝင်များအနေဖြင့် ပြီးခဲ့သောမေလကစ၍ လမ်းပေါ်တွင် ဆန္ဒပြမှုများကို ပြုလုပ်ခဲ့ပြီး ၀န်ကြီးချုပ်ရုံး၏ အဆောက်အအုံပတ်ပတ်လည်တွင် အခြေပြု၍ တစ်ပတ်ကြာနေထိုင်လျက်ရှိပြီး လက်ရှိဝန်ကြီးချုပ် Mr.Samak ရာထူးမှ မနှုတ်မထွက်ခြင်း ဆက်လက်နေထိုုင် သွားမည်ဟု ဆိုပါသည်။ ရွှံ့များဖြစ်ပေါ်လျက်ရှိသောမြေပေါ်တွင် လက်လုပ်တဲများနှင့် အိပ်စရာဖျာများကို အဖော်ပြု၍ နေထိုင်လျက်ရှိသော ဆန္ဒပြသူများကို ဦးဆောင်နေသူမှာ ယခင် ထိုင်းစစ်တပ်ဗို်လ်ချုပ်ဟောင်းနှင့် ဘန်ကောက်မြို့အုပ်ချုပ်ရေးမှူးဟောင်းဖြစ်ခဲ့သူ Mr.Chamlong Srimuang ပင် ဖြစ်ပါသည်။

အရေးပေါ်အခြေအနေကြေညာပြီးနောက် ၎င်းက မိမိတို့အနေဖြင့် တိုက်ပွဲမဖြစ်မနေ ၀င်သွားမည် ဖြစ်ကြောင်း၊ မိမိတို့အတွက် ထိန်းသိမ်းထားနိုင်သည့် အကျဉ်းထောင်များ လုံလောက်စွာ မရှိကြောင်း ပြောကြားသွားပါသည်။

Mr.Thaksin မှာသန်းကြွယ်ဆက်သွယ်ရေး လုပ်ငန်းရှင်ကြီးတစ်ဦးဖြစ်ပြီး၊ ၂၀၀၆ခုနှစ်၊ စက်တင် ဘာလတွင် စစ်တပ်မှ အာဏာသိမ်းပြီးနောက် ရာထူးမှဆင်းပေးခဲ့ရပြီး အမေရိကန်နိုင်ငံ၊ နယူးယောက်မြို့တွင် တစ်နှစ်ကျော်ခန့် မိမိကိုယ်မိမိ ပြည်နှင်ဒဏ်ခံရသူအဖြစ် နေထိုင်နေရသူ ဖြစ်ပါသည်။ ယခုနှစ် အစောပိုင်းတွင် မိမိကိုလိုလားသူ အစိုးရအာဏာရပြီးနောက် ပြန်လာ၍ မိမိအပေါ် စွပ်စွဲထားသော လာဘ်စားမှုများနှင့် အာဏာအလွဲသုံးစားပြုမှုများအပေါ် မဟုတ်မမှန်ကြောင်း တရားရုံး၌ ငြင်းဆိုရန်အတွက် ပြင်ဆင်ခဲ့ပါသည်။

ပြီးခဲ့သောလတွင် Mr.Thaksin ၏ဇနီး Mrs.Pojaman အနေဖြင့် မြေယာလိမ်လည်မှုကိစ္စအတွက် ထောင်ဒဏ်(၃)နှစ် အပြစ်ပေးခံရသည့်နောက် Mr.Thaksin အနေဖြင့် လန်ဒန်မြို့သို့ ထပ်မံထွက်ပြေး ခဲ့ပါသည်။ လန်ဒန်တွင် နိုင်ငံရေးခိုလှုံခွင့် တောင်းခံထားပါသည်။ တရားရုံးမှ မိမိကို စွဲဆိုခဲ့သော ပြစ်မှုများသည် နိုင်ငံရေးအရ ဖန်တီးထားသော ပြစ်မှုများသာဖြစ်ကြောင်း ပြောကြားခဲ့ပါသည်။

လက်ရှိဝန်ကြီးချုပ် Mr.Samak ကို ဝေဖန်ရာ၌ ၎င်းသည် Mr.Thaksin နှင့် ၎င်း၏ပါတီဖြစ်သော People Power Party ၏ လုပ်ပိုင်ခွင့်ကို ရရှိထားသူဖြစ်ပြီး၊ Mr.Thaksin ၏ ပါတီဟောင်းကို အသက်ပြန်သွင်း နေသူသာဖြစ်သည်ဟု ဝေဖန်ကြပါသည်။

ငါးဦးပါ၀င်သော ရွေးကောက်ပွဲကော်မရှင်က တညီတညွတ်တည်း အင်္ဂါနေ့တွင် ဖွဲ့စည်းပုံ အခြေခံဥပဒေပြု တရားရုံးတော်သို့ People Power Party ကို ဖျက်သိမ်းပစ်ရန် တောင်းဆိုထားသည့်မဲကို ပေးခဲ့ကြပါသည်။ အကြောင်းမှာ ဇူလိုင်လတွင် ပြုလုပ်ခဲ့သည့် ရွေးကောက်ပွဲလိမ်လည်မှုကို ပါတီခေါင်းဆောင်တစ်ဦးက ကျူးလွန်ခဲ့ကြောင်းအပေါ် အခြေခံခဲ့ခြင်း ဖြစ်ပါသည်။

အစိုးရဆန့်ကျင်သူများ၏ Mr.Samakအပေါ် ကန့်ကွက်ချက်တစ်ခုမှာ လက်ရှိဝန်ကြီးချုပ် Mr.Samak ပါတီအနေဖြင့် ပါလီမန်တွင် အဓိကအမတ်နေရာအများစုကို ယူထားပြီး ၎င်းကိုဘေးကင်းစေရန်နှင့် Mr.Thaksin ကို တရားရုံးများ၏ စွဲဆိုမှုများမှ လွတ်ကင်းစေရန်အတွက် ဖွဲ့စည်းပုံအခြေခံဥပဒေကို ပြင်ဆင််ရန် အစီအစဉ် ရှိသည်ဟု ကန့်ကွက်ခြင်းပင် ဖြစ်ပါသည်။

သတင်းစာများ၏ သတင်းပေးပို့ချက်အရ လက်ရှိဝန်ကြီးချုပ် Mr.Samak ပါတီအနေဖြင့် မိမိတို့ပါတီ ဖျက်သိမ်းရပါက Mr.Thaksin ပါတီ၏နေရာအား People Power Party မှ နေရာယူသကဲ့သို့ ယူနိုင်ရန် ပြင်ဆင်ဖွဲ့စည်းလျက်ရှိကြောင်း သတင်းပေးပို့ကြပါသည်။

ယခုလို ရှုပ်ထွေးနေသော အခြေအနေတွင် ဘန်ကောက်မြို့တော်၏ဘဝသည် လမ်းပေါ်ရှိ ဆန္ဒပြသူများကြောင့် ထိခိုက်မှုမရှိသလောက်အနေအထားတွင် ရှိပါသည်။ TV မှ နံနက်ခင်း အဓိကရုန်း ဖြစ်မှုပုံများကို ထပ်ခါတလဲလဲ ပြသလျက်ရှိသော်လည်း ၎င်းပုံများသည် ကမ္ဘာပေါ်ရှိ အဓိကရုန်းဖြစ်မှု သတင်းများနှင့် နှိုင်းယှဉ်ပါက ပြောပလောက်သည့် အခြေအနေမရှိကြောင်း တွေ့ရှိရမည် ဖြစ်ပါသည်။

ဘန်ကောက်အပြည်ပြည်ဆိုင်ရာနှင့် ပြည်တွင်းလေဆိပ်များသည် ဖွင့်လျက်ရှိပြီး ဖူခက်နှင့် Krabi တောင်ပိုင်း အပန်းဖြေနေရာများရှိ လေဆိပ်များမှာ လွန်ခဲ့သော တစ်ပတ်ခန့်က ဆန္ဒပြသူများက ပိတ်ခဲ့ပြီးနောက် ပုံမှန်လုပ်ငန်းများ လည်ပတ်လျက်ရှိပါသည်။ သို့ရာတွင် နိုင်ငံအများအပြားက ထိုင်းနိုင်ငံတွင် မငြိမ်သက်ကြောင်း ခရီးသွားလာရေးသတိပေးချက်များ ထုတ်ပြန်ခဲ့ပါသည်။ ထိုင်းနိုင်ငံ ခရီးသွားလာရေး အရာရှိများက နိုင်ငံ၏ အပြံုးဖြင့် ကြိုဆိုသော ပုံရိပ်များနှင့် ယဉ်ကျေးပျူငှာမှုများသည် ပျက်စီးခဲ့ရပြီဟု ဆိုပါသည်။

လင်းဦး(စိတ်ပညာ)